Pretendime virale në rrjete sociale kanë përhapur dezinformata lidhur me paketën e re të Bashkimit Evropian për Parandalimin e Pastrimit të Parave, duke pretenduar se përdorimi i cash-it po “kriminalizohet” dhe se mbajtja e shumave të mëdha të euros do të konsiderohet “kontrabandë”. Këto pretendime nuk qëndrojnë.
Paketa e re e BE-së vendos një kufi prej 10,000 eurosh për transaksionet me para në dorë. Çdo transaksion që e kalon këtë shumë duhet të regjistrohet dhe të justifikohet, në kuadër të përpjekjeve për të frenuar pastrimin e parave dhe financimin e terrorizmit.
Ky kufizim nuk nënkupton ndalim të cash-it. Individët dhe bizneset mund të vazhdojnë ta përdorin normalisht paranë fizike për blerjet e përditshme, për sa kohë që nuk tejkalojnë pragun e vendosur. Në rast të transaksioneve më të mëdha në cash, kërkohet deklarimi i burimit të parave dhe arsyes së përdorimit.
Masat kanë ngjallur reagime nga përfaqësues të shoqërisë civile dhe botës së biznesit, të cilët shprehin shqetësimin se kjo mund të cenojë privatësinë dhe të nxisë kalimin drejt një shoqërie pa para fizike.
Nga ana tjetër, institucionet e BE-së e konsiderojnë paketën një hap të rëndësishëm për forcimin e transparencës financiare, mbrojtjen e sistemit bankar dhe parandalimin e aktiviteteve kriminale.
