Të katërta armët që u gjetën brenda makinës Toyota, të djegur në një fshat të Krujës, dyshohet se janë përdorur në atentatin e sotëm ku mbeti i vrarë Gilmando Dani dhe u plagos rëndë Muçi Shaljani.
Në makinën Toyota Yaris u gjetën tre kallashnikov dhe një pistoletë, çka përputhet me dinamikën e ngjarjes. Fillimisht Mercedesi ku Dani ndodhej si pasagjer u qëllua me breshëri kallashnikovi, më pas një person zbriti prej makinës së atentatorëve dhe qëlloi mbi Danin me pistoletë, duke u siguruar që e kishte vrarë.
Sakaq, makina Mercedes me targa “AB 099UO” është larguar me karotrec nga vendngjarja. Të dyja mjetet dhe armët e zjarrit pritet t’i nënshtrohen ekspertizës me shpresën për zbulimin e ndonjë prove që mund të çojë autoritetet drejt autorëve.
