Pas mbylljes së kutive të votimit më 29 tetor, Komisioni Qendror i Zgjedhjeve publikoi rezultatet preliminare të raundit të dytë të zgjedhjeve lokale për 18 komuna. Lidhja Demokratike e Kosovës (LDK) del fituese, duke marrë pesë nga nëntë komunat ku konkuroi, përfshirë Prishtinën, ku kandidati i saj, Përparim Rama, mundi Hajrulla Çekun nga Lëvizja Vetëvendosje. Kjo fitore do t’i japë LDK-së qeverisjen për katër vitet e ardhshme në kryeqytet dhe në komunat Pejë, Junik, Dragash dhe Viti, të cilat i udhëheq që nga viti 2021. Kryetari i LDK-së, Lumir Abdixhiku, vlerësoi rezultatin si të jashtëzakonshëm përballë një gare të vështirë.
Nga ana tjetër, Lëvizja Vetëvendosje (VV) fitoi katër nga 12 komunat e saj, duke e ndihmuar që për herë të parë të marrë drejtimin e Mitrovicës së Jugut, ku Faton Peci mundi Arian Tahirin nga Partia Demokratike e Kosovës (PDK). VV gjithashtu vazhdon qeverisjen në Gjilan, ndërsa merr edhe Fushë Kosovën dhe Obiliqin. Kryeministri Albin Kurti theksoi se humbjet e opozitës erdhën nga përpjekja e kombinuar ndaj VV-së.
Aleanca për Ardhmërinë e Kosovës (AAK) regjistroi katër fitore në pesë komunat ku garoi, duke ruajtur qeverisjen në Gjakovë, Suharekë, Rahovec dhe Klinë. Kryetari Ramush Haradinaj shprehu kënaqësi për rezultatin dhe kërkoi që kryetarët të përmbushin përgjegjësitë e tyre.
PDK arriti të fitojë tre nga gjashtë komunat në balotazh, duke vazhduar qeverisjen në Prizren, Kaçanik dhe Vushtrri. Lista Serbe mori fitore në Kllokot, ndërsa KDTP-ja turke fitoi në Mamushë.
Të hënën priten verifikimet e rezultateve preliminare në Qendrat Komunale të Numërimit, që do të përfshijnë numërimin e votave të kushtezuara dhe atyre nga diaspora. Pas përfundimit të përllogaritjes, është e qartë se VV dhe LDK do të udhëheqin nga shtatë komuna secila, ndërsa PDK do të ketë gjashtë, AAK-ja pesë dhe partitë tjera një secila.
