Kryetari i Partisë Demokratike, Sali Berisha, i bëri apel qeverisë t’u kthejë pas të gjithë qytetarëve paratë që kanë paguar për gjobat e vendosura për ndërtimet pa leje.
Berisha shfrytëzoi mbledhjen me drejtuesit politikë për të sjellë në vëmendje se falja e gjobave nuk mjafton, pasi ligji është shpallur antikushtetues nga Gjykata Kushtetuese.
“Po heq gjobat? Jepua, kthejua të gjithë atyre që u ke marrë që nga viti 2014 me një ligj antikushtetues,” tha Berisha.
Fokusi i takimit të kryetarit të PD-së me drejtuesit politikë ishte fushata elektorale jashtë kufijve të Shqipërisë, pasi më 11 maj emigrantët do të votojnë për herë të parë aty ku jetojnë dhe punojnë. Berisha përsëriti vullnetin e opozitës për të miratuar çdo akt që garanton votën e emigrantëve.
“Ecuria në rrafshin zyrtar dhe burokratik nuk është ajo që duhet të ishte. Duhej të ishte më e shpejtë, por natyrisht Edi Rama përpiqet, një akt që nuk e ka dashur kurrë, bën gjithçka për ta sabotuar. Ne qëndrojmë të hapur dhe të vendosur për çdo vendim që mundëson votën masive, pa diskriminim të qytetarëve tanë shqiptarë, kudo që janë,” shtoi kryetari i PD-së.
PD-ja ka caktuar si drejtuese politike për votën e diasporës Jozefina Topallin, ndërkohë që secili prej drejtuesve politikë ka nisur të vendosë kontakte me demokratët që gjatë viteve të fundit janë larguar jashtë vendit.
