Detaje të reja kanë dalë lidhur me arrestimin e ish-ushtarakut Altin Celami, i cilu ra në prangat e bluve dy ditë më parë pasi akuzohet se furnizonte me armë vrasësit.
Burime për mediat bëjnë me dije se Celami ishte mbajtur prej disa javësh nën vëzhgim nga policia, ndërkohë që përdorte një taksi me qëllim për t’u “shpëtuar” policisë dhe të kamuflohej për të furnizuar me armë grupet kriminale.
Në dëshminë e tij, ish-ushtaraku ka deklaruar se armët ishin të tijat dhe i ka pranuar akuzat e ngritura ndaj tij, ndonëse nuk ka dashur që të japë më tepër detaje.
Efektivët e Komisariatit të Policisë Nr. 4 në bashkëpunim me Seksionin e Trafiqeve të DVP Tiranë, nën drejtimin e Prokurorisë së Tiranës, finalizuan operacionin policor të koduar “Gun Expert”.
Altin Celami, 46 vjeç dhe banues në Tiranë, u arrestua në flagrancë teksa drejtonte automjetin tip taksi. Gjatë kontrollit fizik, të automjetit dhe të banesës, iu gjetën 4 armë zjarri pistoletë me municion luftarak, të cilat nga hetimet dyshohet se do t’iu shiteshin grupeve kriminale, lëndë narkotike kokainë dhe pjesë të ndryshme arme të cilat u sekuestruan në cilësinë e provës materiale së bashku me automjetin.
Dyshohet se armët u shiteshin grupeve kriminale në Fresk dhe Kamëz dhe nuk ishte hera e parë që bëhej një rrugë e tillë.
Policia kishte dokumentuar disa raste të tilla, të paktën 10 raste. Gjithashtu bëhet me dije se një pjesë e pistoletave vinin nga Kosova dhe ishin armë që modifikoheshin në banesë, në mënyrë që të përdoreshin vetëm një herë dhe pastaj të shkriheshin ose të hidheshin.
Kjo ishte një metodë që Celami e përdorte në mënyrë që grupet kriminale t’i blinin përsëri armët tek ai, pasi kjo lloj arme ishte e vështirë të gjurmohej.
Altin Celami nuk është një emër i panjohur për autoritetet e zbatimit të ligjit, pasi është arrestuar dhe tre vite më parë, për të njëjtën akuzë, se blinte armë zjarri kundrejt pagesës dhe më pas ua shiste ato grupeve kriminale dhe vrasësve me pagesë.
46 vjeçari ka qenë ushtarak në Repartin e Pezë Helmësit, por për arsye të panjohura ishte pezulluar nga shërbimi, deri kur u arrestua në 2022.
