Barcelona ka marrë një fitore të rëndësishme 4-2 në transfertë ndaj Celta Vigos, në një ndeshje plot ritëm e gola në La Liga. Protagonisti absolut ishte Robert Lewandowski, i cili realizoi një hat-trick në rikthimin e tij në formacionin titullar, ndërsa Lamine Yamal vulosi rezultatin në fundin e pjesës së parë.
“Blaugranat” kaluan të parët në avantazh me penalltinë e Lewandowskit në minutën e 10-të, por Celta reagoi menjëherë me golin e Carreira-s. Polaku riktheu epërsinë në të 37-ën, por vendasit barazuan sërish në minutën e 43-të me Iglesias. Megjithatë, Yamal shënoi një gol të bukur në shtesën e pjesës së parë, duke i dërguar katalanasit në pushim me avantazh 3-2.
Në pjesën e dytë, Barcelona dominoi plotësisht, dhe Lewandowski vulosi “tripletën” e tij personale në minutën e 74-t, pas një asisti të Marcus Rashford. Me këtë fitore, skuadra e Hansi Flick afrohet në vetëm tre pikë nga Real Madrid, duke mbajtur gjallë garën për kreun e La Ligës.
