Europol ka zbuluar se aplikacioni i koduar “Matrix” është përdorur gjerësisht nga grupe kriminale në Shqipëri, duke çuar drejt një vale të re hetimesh dhe arrestimesh të pritshme. Ky aplikacion ka shërbyer si një mjet i sigurt për komunikim midis anëtarëve të bandave, dhe deshifrimi i bisedave të tij ka nxjerrë në dritë detaje tronditëse mbi ngjarje kriminale.
Një ndër ata që ka ndihmuar në zbardhjen e përdorimit të “Matrix” është Nuredin Dumani, i penduari që ka rrëfyer në SPAK për porositësit dhe krimet e kryera. Në dëshmitë e tij, Dumani përmend një komunikim me Suel Çelën, ku ky i fundit i kishte dhënë kontaktin e një personi që kërkonte eliminimin e pronarit të një shkolle private për një shumë prej 150,000 eurosh.
Ndërkohë, Ardian Sufaj, i arrestuar në Shqipëri për llogari të Italisë si pjesë e një grupi trafikimi kokaine nga Amerika Latine, ka theksuar në një bisedë të zbardhur nga Anti-Mafia italiane se aplikacioni ishte i pakalueshëm për autoritetet. Ai shprehej:
“Mund ta jap në dorë … nuk mund ta hapin kurrë … kurrë … duhen 75 vjet për t’i hapur këto dhjetë … Izraelitët janë … 100 % të koduar … ata quhen Matrix … kjo është një Matricë …”.
Aplikacioni “Matrix” është zbuluar edhe në operacione të mëdha kundër drogës, si ai i Anti-Mafias italiane në nëntor 2023, ku u lëshuan 19 urdhër-arreste për trafik ndërkombëtar droge. Raportet tregojnë se korrierët përdornin celularë të pajisur me këtë sistem të mesazheve të koduara për të koordinuar logjistikën dhe lëvizjen e drogës.
Në atë operacion u sekuestruan 420 kg kokainë, heroinë dhe hashash, dhe u arrestuan disa individë në Shqipëri, përfshirë Ardian Korrikun, Jurgen Korrikun dhe Etleva Adamin.
Hetimet po intensifikohen, dhe pritet që deshifrimi i mëtejshëm i të dhënave nga “Matrix” të çojë drejt arrestimeve të reja në të dy anët e kufirit.
