Pas takimit me Donald Trump në Shtëpinë e Bardhë, Viktor Orbán shpalli me entuziazëm se ka siguruar një përjashtim njëvjeçar nga sanksionet për gazin dhe naftën ruse që Hungaria përdor. Kjo marrëveshje përbën një fitore për kryeministrin hungarez, por edhe për Trumpin, duke pasur parasysh angazhimet e Budapeshtit për investime në sektorin e energjisë në SHBA.
Gjatë takimit, Trump lavdëroi Orbánin dhe e injoroi kritikat mbi blerjen e naftës ruse nga Hungaria, duke u fokusuar në përputhjen e axhendave të tyre për politikat e emigracionit. Trump nënvizoi se liderët e tjerë evropianë duhet të respektojnë Hungarin dhe të pranojnë vizionin e Orbán mbi emigrimin. “Shikoni se çfarë ndodhi në Europë: atje kanë vërshuar njerëz nga disa vende të cilat nuk i njohim fare”, tha Trump.
Sipas të dhënave të Fondit Monetar Ndërkombëtar, Hungaria është e varur nga Rusia për 74% të gazit dhe 86% të naftës së saj. Trump, i cili bëri një përjashtim të veçantë për dy kompanitë e mëdha ruse të naftës, argumentoi se Hungaria, për shkak të mungesës së daljeve në det, ka vështirësi më të mëdha për të siguruar furnizimeve alternative. Ai kritikoi vendet evropiane që kanë porte dhe vazhdojnë të blejnë energji ruse, pa i përmendur ato me emër.
Temë e takimit ishte gjithashtu lufta në Ukrainë, ku Trump dhe Orbán diskutuan për samitin SHBA-Rusi. Muajin e kaluar, Trump kishte njoftuar një takim me Presidentin rus Vladimir Putin në Budapest, por ky takim u shty për shkak të refuzimit të Moskës për një armëpushim.
Kjo marrëveshje për energjinë mund të rrisë tensionet mes Shteteve të Bashkuara dhe vendeve të tjera evropiane që ndjekin politika të ndryshme në lidhje me energjinë ruse, duke e bërë situatën edhe më delikate në kontekstin geostrategjik aktual.
