Gjatë fjalës së tij në Kuvend, teksa komentoi raportimin e kreut të KLSH Arben Shehu në seancën plenare të kësaj të enjte, deputeti i PS-së Erjon Braçe, ka denoncuar sjelljen e organeve fiskale.
Braçe denoncoi se në Tiranë, një bisnes është gjobitur me 8,2 milionë lekë të vjetra pasi nuk kishte lëshuar një faturë për shitjen e15 kilogramëve gjizë.
“Dhe organet fiskale, e kanë këtë qasje dhe sjellje, sillen egër, shumë fortë me të dobëtin dhe mungojnë në drejtoritë më të rëndësishme thuhet në raportin e KLSH. Sjell në vëmendje këtë akt konstatimi apo gjobe. Një biznes, në Tiranë, në periferi të saj, do e lexoj se më ka bërë shumë përshtypje: në momentin e kontrollit rezulton se nuk lëshon faturë tatimore për gjizë në shqip, në shifrën 229 lekë për njësi, në sasinë 15 kilogramë. Dhe gjoba është 822 mijë lekë të reja, ose 8,2 milionë lekë të vjetra. E kjo vetëm për 15 kile njomëz apo gjizë”, tha Braçe gjatë fjalës së tij në Kuvend.
