Policia e Durrësit ka finalizuar operacionin e koduar “Mesnata”, duke vënë në pranga një 32-vjeçar që qarkullonte i armatosur me pistoletë.
Operacioni u zhvillua nga Forca e Posaçme “Shqiponja”, në bashkëpunim me Specialistët për Hetimin e Krimeve, pas informacioneve të siguruara në rrugë operative për persona që lëviznin me armë pa leje.
Gjatë ndërhyrjes, në lagjen nr. 18 të qytetit, u ndalua automjeti që drejtohej nga shtetasi me iniciale E. K. Në kontrollin fizik, policia i gjeti në çantën marsup një armë zjarri pistoletë, të cilën e posedonte pa leje.
Më pas, gjatë kontrollit në banesën e tij, u sekuestrua edhe një sasi municioni luftarak.
Nga verifikimet rezultoi gjithashtu se 32-vjeçari drejtonte automjetin pa leje drejtimi.
Në përfundim të veprimeve procedurale, E. K., banues në Durrës, u arrestua në flagrancë për veprat penale “Mbajtja pa leje dhe prodhimi i armëve, armëve shpërthyese dhe i municionit”, si dhe “Drejtimi i automjeteve në mënyrë të parregullt”.
Materialet i kaluan Prokurorisë së Durrësit për veprime të mëtejshme.
