Partizani mbetet i vetmi klub në Kategorinë Superiore që ende nuk ka një trajner, vetëm pak javë para nisjes së sezonit të ri, më 23 gusht. Kanë kaluar mbi shtatë ditë nga dorëheqja e Skënder Gegës, por situata në klub mbetet e paqartë.
Pas largimit të Gegës, drejtimin e përkohshëm të skuadrës e ka marrë Fatjon Muhameti, trajneri i ekipit U-19. Dorëheqja e Gegës erdhi menjëherë pas eliminimit të Partizanit nga skuadra estoneze Kalju, në raundin e parë të Ligës së Konferencës, një dështim që cënoi objektivat sezonalë të klubit dhe i dha fund për herë të dytë aventurës së tij në stolin e “demave”.
Që prej asaj dite, drejtuesit e klubit kanë nisur kërkimin për trajnerin e ri, duke shqyrtuar disa profile, mes të cilëve përmenden emra të huaj si Moriero, Cvitanoviç dhe Milinkoviç. Vendimi për trajnerin e ardhshëm po merret me kujdes të madh, për shkak të presionit të lartë për të mos gabuar.
Skënder Gega përfaqësonte një figurë të rëndësishme për Partizanin, jo vetëm si ish-kampion në stolin e klubit, por edhe si një trajner me mbështetjen e tifozëve. Pas largimit të tij të parë në vitin 2019, Partizani i besoi italianit Franko Lerda, i cili megjithëse pati një qëndrim të shkurtër, arriti të fitojë Superkupën. Megjithatë, humbja në derbin ndaj Tiranës la një shije të hidhur dhe e mbylli shpejt aventurën e tij.
Kur ndodhemi vetëm tri javë para nisjes së kampionatit, Partizani ndodhet në një udhëkryq të rëndësishëm. Sezoni është afër dhe skuadra ka nevojë për një udhëheqës të ri në pankinë.
