14-vjeçari me origjinë nga Kosova shpëton shokun e tij në Gjermani – shpallet hero nga komuniteti
Një 14-vjeçar me rrënjë nga Kosova, Len Fejzullahu, është bërë hero në Gjermani pas një akti të jashtëzakonshëm guximi, ku shpëtoi shokun e tij të klasës nga një sulm i dhunshëm.
Ngjarja ka ndodhur në oborrin e një shkolle në Friedberg, pak para fillimit të mësimeve. Një adoleshent 15-vjeçar, i veshur me uniformë ushtarake dhe i armatosur me një çekiç, sulmoi dy nxënës 14-vjeçarë.
Në momentin e sulmit, Len ndodhej pranë shokëve të tij dhe fillimisht mendoi se gjithçka ishte një shaka, por shumë shpejt kuptoi se situata ishte serioze. Sulmuesi goditi në kokë një nga shokët e tij, duke i rrezikuar jetën, dhe në atë çast Len ndërhyri me guxim.
Ai arriti t’i afrohej agresorit, t’ia rrëmbente çekiçin dhe ta neutralizonte duke e goditur, para se të vraponte drejt shkollës për të kërkuar ndihmë. Dy mësues njoftuan menjëherë policinë dhe ambulancën.
Shoku i tij u dërgua me urgjencë në spital me lëndime të rënda, ndërsa 15-vjeçari agresor u arrestua dhe po hetohet për tentativë vrasjeje. Hetuesit po shqyrtojnë nëse rasti ka lidhje me motive ekstremiste.
Pas ngjarjes, Len ka reaguar ndaj komenteve në TikTok që e paraqesin sulmuesin si viktimë të bullizmit, duke theksuar se e njihte vetëm si një njohje të rastësishme.
Për guximin e tij, kryebashkiaku Roland Eichmann e ka ftuar Lenin për ta përshëndetur publikisht dhe për ta falënderuar në emër të qytetit. Ai vetë ka rrëfyer se vetëm më vonë kuptoi rrezikun real, pasi agresori kishte pasur me vete edhe një thikë.
Ngjarja ka tronditur komunitetin e Friedbergut dhe ka ngritur shqetësime serioze për sigurinë në shkolla, duke nxitur thirrje për masa më të forta mbrojtëse dhe mbikëqyrje më të kujdesshme ndaj të rinjve.
