I transferuar te Bayern në vitin 2011, sot Manuel Neuer firmosi kontratën e tij të re në Mynih për një sezon tjetër. Kontrata e fundit skadonte më 1 korrik 2025.
Ky do të jetë sezoni i 16-të i gardianit gjerman, i cili u bë kapiten që nga viti 2017. “Më pëlqen të luaj futboll dhe dua të mbetem lojtar i këtij klubi. Jam i motivuar ende dhe mezi pres një vit tjetër në këtë klub të madh”, u shpreh Neuer për uebsajtin zyrtar të klubit.
“Këtu kemi pasur gjithmonë bisedime të mira dhe kam një ndjesi të mirë vërtet. Kemi plot objektiva për të arritur së bashku”, deklaroi portieri.
