Manchester City ka konfirmuar zyrtarisht se Pep Guardiola do të largohet nga klubi pas ndeshjes së fundit të sezonit ndaj Aston Villa në Etihad Stadium.
Trajneri spanjoll mbyll kështu një epokë historike 10-vjeçare te City, ku fitoi 17 trofe të mëdhenj, përfshirë gjashtë tituj të Premier League dhe Champions League.
“Mos më pyesni për arsyet e largimit. Nuk ka një arsye të vetme, por brenda meje e di se ka ardhur koha. Asgjë nuk është e përjetshme. Të përjetshme do të jenë ndjenjat, njerëzit, kujtimet dhe dashuria që kam për Manchester City”, u shpreh Guardiola.
Sipas BBC Sport, City kishte nisur përgatitjet për largimin e Guardiola që të hënën, edhe pse trajneri kishte ende një vit kontratë me klubin.
Favorit për ta zëvendësuar shihet Enzo Maresca, ish-trajneri i Chelsea, i cili ka punuar më parë si pjesë e stafit të Guardiola te Manchester City.
Largimi i tij vjen vetëm pak ditë pasi City humbi garën për titullin e Premier League ndaj Arsenal. Barazimi ndaj Bournemouth bëri që “Topçinjtë” të shpalleshin kampionë për herë të parë pas 22 vitesh.
Gjatë periudhës së tij, Guardiola e transformoi Manchester City në një nga skuadrat më dominuese të futbollit anglez dhe europian. Kulmi erdhi në sezonin 2022/23, kur City fitoi tripletën historike: Premier League, FA Cup dhe Champions League.
Pavarësisht largimit nga stoli, Manchester City ka bërë të ditur se Guardiola do të vazhdojë marrëdhënien me City Football Group, duke marrë rolin e ambasadorit global.
