Antoine Griezmann do të nisë një aventurë të re në karrierën e tij, pasi Atletico Madridi ka zyrtarizuar largimin e sulmuesit francez drejt Orlando Cityt, duke filluar nga sezoni i ardhshëm. Klubi madrilen konfirmoi marrëveshjen me skuadrën amerikane, duke i dhënë fund një epoke të paharrueshme për një nga lojtarët më të rëndësishëm në historinë e “Los Colchoneros”.
Në deklaratën zyrtare, Atletico bëri të ditur se golashënuesi më i mirë në historinë e klubit do të transferohet në MLS verën e ardhshme, pas plot 10 sezonesh me fanellën kuqebardhë. Griezmann iu bashkua Atleticos në korrik të vitit 2014 nga Real Sociedad dhe gjatë kësaj periudhe u kthye në një legjendë të klubit, duke shënuar 211 gola dhe duke u renditur i pari në listën e golashënuesve të historisë së klubit. Po ashtu, me 488 paraqitje, ai mban vendin e katërt mes futbollistëve me më shumë ndeshje për Atletico Madridin.
Gjatë kohës së tij në Madrid, Griezmann fitoi tre trofe me klubin: Superkupën e Spanjës në vitin 2014, Europa League dhe Superkupën e Europës në vitin 2018. Përtej statistikave dhe trofeve, ai ka lënë gjurmë të thella te tifozët e Atleticos, falë shpirtit luftarak, golave vendimtarë dhe lidhjes së fortë emocionale me klubin.
Edhe Orlando City e bëri zyrtare afrimin e francezit, duke njoftuar se Griezmann do t’i bashkohet klubit në korrik të vitit 2026 me një kontratë deri në sezonin 2027-28, me opsion rinovimi edhe për një tjetër vit. Ai do të transferohet si një “Designated Player”, duke u kthyer menjëherë në një nga figurat kryesore të projektit të klubit amerikan.
Presidenti dhe pronari i Orlando Cityt, Mark Wilf, e cilësoi afrimin e Griezmann si një moment historik jo vetëm për klubin, por edhe për qytetin dhe për MLS. Sipas tij, futbollisti francez është një nga lojtarët më të talentuar dhe me më shumë ndikim të brezit të tij, ndërsa zgjedhja e tij për Orlando Cityn pasqyron ambicien dhe kulturën që klubi dëshiron të ndërtojë.
Nga ana e tij, Griezmann u shpreh shumë i emocionuar për këtë kapitull të ri në karrierë. Ai deklaroi se bisedat e para me klubin amerikan i dhanë ndjesinë e një projekti me ambicie të mëdha dhe një vizion të qartë për të ardhmen, gjë që e bindi të pranonte ofertën. Francezi theksoi se mezi pret ta bëjë Orlandon shtëpinë e tij të re, të njohë tifozët dhe të japë maksimumin për të ndihmuar skuadrën të arrijë objektiva të mëdha.
Megjithatë, Griezmann nuk harroi as Atletico Madridin dhe tifozët e tij. Në mesazhin e lamtumirës, ai u shpreh se klubi është shtëpia e tij dhe tifozët janë familja e tij, duke nënvizuar se ende nuk është momenti i ndarjes përfundimtare. Francezi premtoi se do të japë gjithçka deri në frymën e fundit të sezonit 2026, me synimin për të luftuar për Kupën e Mbretit dhe për të shkuar sa më larg në Champions League.
Me këtë transferim, mbyllet një kapitull i artë në historinë e Atletico Madridit dhe nis një sfidë e re për Griezmannin në futbollin amerikan, aty ku pritet të jetë figura kryesore e Orlando Cityt në vitet e ardhshme.
