Barcelona ka njoftuar zyrtarisht se ka ndërmarrë hapa ligjorë kundër presidentit të Real Madrid, Florentino Pérez.
Përmes një postimi në llogarinë zyrtare në X, klubi katalanas bëri të ditur se ka paraqitur një padi për shpifje ndaj Pérez, pas deklaratave të bëra prej tij në një konferencë për shtyp më 12 maj dhe në një intervistë mediatike një ditë më pas.
Sipas Barcelonës, deklaratat e presidentit të Real Madrid përmbajnë akuza të rreme ndaj klubit katalanas. Për këtë arsye, në bazë të nenit 205 të Kodit Penal spanjoll, Barça ka dorëzuar edhe kërkesën e detyrueshme për pajtim.
Klubi thekson se nuk ka si qëllim t’i shkaktojë dëm personal Florentino Pérez, por kërkon drejtësi dhe tërheqjen publike të akuzave që i konsideron të pavërteta.
Barcelona i ka lënë kohë presidentit të Real Madrid të kërkojë falje publikisht. Në të kundërt, çështja pritet të kalojë në gjykatë, ku Pérez do të duhet të mbrojë deklaratat e tij.
