Rreth 30 banorë janë evakuuar nga shtëpitë e tyre në zonën e sipërme të Val de Bagnes, në kantonin Valais të Zvicrës, pas reshjeve të dendura që shkaktuan një rrëshqitje të madhe balte.
Banorët e fshatit Les Epenays janë zhvendosur për një periudhë të pacaktuar. “Varet nga natyra, ajo vendos ligjet,” tha Antoine Schaller, zëvendëssekretar i përgjithshëm i komunës së Val de Bagnes, për mediat lokale.
Zona u përball me stuhi të forta javën e kaluar, të cilat sollën rrëshqitjen e baltës, drurëve dhe gurëve, duke shkatërruar një urë të përkohshme emergjence. Megjithatë, ndërtesat e fshatit kanë shpëtuar nga dëmtimet.
“Shqetësimi më i madh është se sasia e rrëshqitjes po rritet. Gjithashtu, një zonë e tërë në mal është duke u zhvendosur me një shpejtësi prej rreth dy metrash në ditë,” u shpreh Pierre-Martin Moulin, Sekretar i Përgjithshëm i Val de Bagnes.
Glaciologët zviceranë kanë paralajmëruar prej vitesh për rrezikun e shkrirjes së akullnajave, duke e lidhur këtë fenomen me ngrohjen globale që po përshpejton tërheqjen e akullnajave në Zvicër.
