Një zjarr i madh që shpërtheu mesditën e së mërkurës në disa ndërtesa të larta në zonën Tai Po, në veri të Hong Kongut, ka shkaktuar vdekjen e katër personave. Nga ndërtesat vazhdojnë të ngrihen re të dendura tymi të zi, ndërsa zjarrfikësit po punojnë intensivisht për shuarjen e flakëve.
Sipas rrjetit publik RTHK, disa persona kanë mbetur të bllokuar brenda godinave, ndërsa një burrë raportohet se ka marrë djegie të rënda, bazuar në informacionet e policisë.
Zjarri u raportua për herë të parë në orën 14:51, me orën lokale, në kompleksin Wang Fuk Court. Vetëm 40 minuta më vonë, rreth orës 15:34, ngjarja u klasifikua në nivelin e katërt të alarmit.
Kompleksi Wang Fuk Court përbëhet nga tetë ndërtesa dhe përfshin rreth 2.000 apartamente. Përreth kullës ku nisi zjarri ndodhen edhe godina të tjera të mbështjella me skela bambuje, duke e vështirësuar më tej situatën.
