Në autostradën tashmë të zgjeruar të Tiranë-Durrësit, shpejtësia me të cilën lejohet të qarkullosh është 100 kilometër në orë për shkak të punimeve. Kur projekti i zgjerimit të marrë formë të plotë, shpejtësia do të rritet në 140 kilometër në orë.
“Punimet aktuale përfshijnë rritje të kategorisë së autostradës, e cila kalon në kategorinë A, por për shkak të intensitetit të punimeve dhe të afërsisë së mbikalimeve me njëri-tjetrin sepse kemi edhe nyjen e Laknasit, edhe atë të Rinasit që janë në një distancë relativisht të shkurtër, fillimisht kemi vendosur që shpejtësia të jetë 100 kilometra në orë. Një element shtesë është që do të kemi edhe kamerat e monitorimit, që do të jenë të vendosura në të gjitha mbikalimet e këmbësorëve”, tha Ami Kozeli, drejtor i Autoritetit Rrugor Shqiptar.
Pas zgjerimit, edhe mbikalimet e këmbësorëve do të rimodelohen.
“Ne do të nisim zbatimin e kontratës për modelimin dhe arredimin urban, ku përfshihet përveç gjelbërimit, që do të bëhet në të dy anët e rrugës dhe në trafikndarëse në mes, do të jetë edhe ndriçimi. Është një element që do të përfshihet në kontratën e re, ashjtu si edhe mbikalimet e këmbësorëve që do të jenë 6 në total, në pozicionet që kanë ernë më përpara, por tani do të jenë më të zmadhuara sepse kemi zgjerim të autostradës”, shtoi Kozeli.
Pas zgjerimit të 7 kilometrave të parë të autostradës, Autoriteti Rrugor Shqiptar po vijon punimet për ndërtimin e mbikalimeve të Rinasit dhe të Laknasit.
“Në këtë moment kanë filluar punimet për vendosjen e pilotave mbështetëse të mbikalimit të Laknasit. Në këtë moment kemi devijuar trafikun në korsinë e emergjencës, dhe në korsinë e tretë, atë të avashtë. Ndërkohë që do të bëhet edhe kanali i drenazhimit, disiplinimit të ujërave të mbikalimit të Laknasit. Këto punime ne parashikojmë që do të zgjasin 45-50 ditë, sepse janë volume të mëdha. Në të njëjtën kohë ne po vijojmë punimet edhe për mbikalimin e Rinasit, në këtë moment është krijuar rampa provizore në drejtimin Tiranë-Rinas, ndërkohë që po bëjmë spostimin e një kabine elektrike që është në rampë zbritëse, nga Rinasi në drejtim të Durrësit. Në momentin që ndodhin këto dhe një shpronësim që po e presim nga Këshilli i Ministrave, ne do të fillojmë edhe demontimin e mbikalimit të Rinasit”, tha kreu i ARRSH.
Drejtori i ARRSH-së, Ami Kozeli, shpjegon në një intervistë për “Vizion Plus” pse duhet demontuar mbikalimi i Rinasit dhe si do të devijohet qarkullimi.
“Duhet demontuar sepse përkon me zgjerimin e aksit rrugor, që të shkojmë me të njëjtën gjerësi. Akitualisht kalojmë nga 3 korsi, në 2 korsi. Me demontimin e mbikalimit të Rinasti, është e nevojshme të informojmë si do të jetë trafiku: për të shkuar në Rinas nga Tirana, do të jenë dy mundësi, ajo aktuale, pra rruga pa pagesë që është aktualsht, përmes rampës provizore, edhe ajo me pagesë natyrisht. Ndërkohë që drejtimi Durrës-Tiranë, rruga pa pagesë do të jetë ajo e Vorës. Mbikalimi i ri do të jetë 94 metër i gjatë. Për ndërtimin e mbikalimit nuk kam afat specifik, por është mujor”, deklaroi Kozeli.
Punimet për zgjerimin e mëtejshëm të autostradës, pritet të nisin brenda këtij viti.
“Për lotet e tjera, ne duam ti afrojmë në momentin më të parë që të ndodhë rishikimi i buxhetit, shpresojmë që të nisë zhvillimi i tyre brenda 2026. Janë dy lote që përkojnë Vorë-Fushë Krujë deri te dalja e Vorës, pra e kalojmë edhe rrethrrotullimin e Vorës, në rrugën e trenit që është pas Vorës”, tha ai.
Sa i takon rehabilitimit të rrugës dytësore, Ami Kozeli sqaroi:
“Rrugët dytësore nuk janë në inventarin e ARRSH. Në dijeninë time, Bashkia Tiranë ka pasur një plan për rehabilitimin e plotë të rrugës dytësore, por në bashkërendim, ne i frenyuam sepse nuk mund të nisnim punimet në të dy rruygët në të njëjtën kohë.”
Ndërkohë, punimet për lotin e parë të rrugës së Ndroqit, pritet të përfundojnë në mesin e korrikut, për të vijuar më pas me dy fazat e tjera që në total do të jenë të shtrira në 9.8 kilometër.
