Në prag rë zgjedhjeve të 11 majit, Komisioni Qendror i Zgjedhjeve ka gati 3 skenarët për përdorimin e votimit dhe numrimit elektronik.
Mësohet se në skenarin e parë të KQZ parashikon votim elektronik në 6 Njësi në Tiranë dhe 3 në Vorë. Në skenarin e dytë të KQZ parashikohet votim elektronik në 5 Njësi në Tiranë dhe 3 në Vorë. Skenari 3 parashikon votim elektronik në 2 Njësi në Tiranë 3 në Vorë dhe në 5 rajone të Durrësit.
Këto 3 variante i janë përcjellë partive politike dhe Komisionit Rregullator për njohje nga Ilirjan Celibashi.
Votimi dhe numërimi elektronik u provua për herë të parë në zgjedhjet e vitit 2021, në njësinë 10 në kryeqytet. Ndërsa në vitin 2023, u zgjerua në bashkitë Elbasan, Kamëz dhe Vorë. Pavarësisht se këto makineri janë të shtrenjta, ato mund të prodhojnë rezultat brenda një orë nga mbyllja e votimit, duke shmangur orë e ditë të tëra numërimi, që hera herës prodhonin konflikte.
