Milano, kryeqyteti botëror i milionerëve: 1 në çdo 12 banorë është super i pasur
Milano renditet në vendin e parë në botë për përqindjen e milionerëve, sipas raportit të fundit vjetor të publikuar nga Henley & Partners.
Të dhënat tregojnë se një në çdo 12 banorë të qytetit është milioner, duke e vendosur kryeqytetin lombard përpara metropoleve më të mëdha globale.
Milano lë pas qytete si Parisi, ku raporti është një milioner për çdo 14 banorë, dhe pothuajse dyfishon New York-un, i cili numëron një milioner për çdo 22 rezidentë. Ndërkohë, në Romë statistikat janë shumë më modeste, me vetëm një milioner për çdo 54 persona.
Nëse fokusi ngushtohet te të ashtuquajturit “centimilionerë”, pra individë me pasuri mbi 100 milionë euro, Milano numëron 182 të tillë.
Kjo shifër është vetëm 10 më pak se Principata e Monakos, e njohur si parajsë fiskale, dhe tejkalon ndjeshëm zona të njohura si kantoni i Zyrihut, Miami apo Moska.
Sipas Henley & Partners, suksesi i Milanos lidhet drejtpërdrejt me eksodin më të madh të miliarderëve në histori, i cili ndodhi vitin e kaluar nga Londra.
Heqja nga qeveria laburiste e regjimit fiskal “non-dom” ka shtyrë shumë super të pasur të ndryshojnë rezidencë, duke zgjedhur Milanon për pozicionin e saj strategjik, rolin në biznes dhe dominimin në industrinë e modës.
Një tjetër faktor që e bën Italinë, e veçanërisht Milanon, gjithnjë e më tërheqëse për kapitalet e mëdha është ligji kombëtar për taksën e trashëgimisë, e cila është vetëm 4%, në linjë me sistemin zviceran.
Ky regjim fiskal po tërheq gjithnjë e më shumë pasuri të mëdha, duke e konsoliduar Milanon si një nga qendrat kryesore të pasurisë globale.
