Një laborator i madh për kultivimin dhe përpunimin e kanabisit është zbuluar në një magazinë të braktisur në zonën industriale të Montanaso Lombardos, në periferi të Lodit. Operacioni u zhvillua të hënën pasdite nga policia e Unione Nord Lodigiano, pas dyshimeve për lëvizje të pazakonta pranë objektit.
Struktura me sipërfaqe rreth 1,000 metra katrorë, ishte transformuar në një hapësirë të përshtatur për prodhim të marijuanës.
Brenda saj u gjetën mbi 200 bimë kanabisi dhe rreth 15 kilogramë lëndë narkotike e paketuar, e gatshme për treg. Në vendngjarje u arrestuan dy persona, një shtetas shqiptar dhe një francez, të dy me të shkuar kriminale për trafik droge.
Policia gjeti pesë dhoma të posaçme për kultivim, ndriçim të posaçëm me llamba natriumi, sisteme ventilimi dhe tharjeje, pajisje për paketim si dhe kamera sigurie që monitoronin objektin në kohë reale.
Hetuesit e përshkruajnë ambientin si një linjë funksionale për prodhimin e kanabisit, nga kultivimi deri te paketimi final.
Magazina rezulton e marrë me qira për më shumë se një vit dhe është regjistruar në emër të një gruaje rezidente në zonë, e cila tani është pjesë e hetimeve.
Rasti nisi pas një raportimi për aromë të fortë marijuane dhe lëvizje të shpeshta njerëzish në zonë. Kontrollet e para konfirmuan dyshimet, duke çuar në bastisjen e autorizuar nga prokuroria e Lodit dhe mbështetur nga zjarrfikësit.
Sipas vlerësimeve fillestare, pajisjet dhe droga e sekuestruar kapin një vlerë prej më shumë se 300 mijë euro, por duke marrë parasysh strukturën dhe investimin, vlera mund të jetë dyfish më e lartë.
Hetimet po vijojnë për të zbuluar rrjetin pas laboratorit, burimet financiare dhe kanalet e shpërndarjes së drogës. Gjithashtu po verifikohet nëse ka pasur lidhje të paligjshme me rrjetin elektrik të zonës industriale. Autoritetet kanë njoftuar se kontrollet në zonat industriale të ngjashme do të shtohen me qëllim parandalimin e përdorimit të tyre për veprimtari kriminale.
