Një investigim i përbashkët i BBC dhe 14 transmetuesve të tjerë publikë zbulon se rreth 200 fëmijë në 14 vende europiane janë krijuar duke përdorur material gjenetik nga një dhurues që është bartës i një mutacioni gjenetik të lidhur me kancerin. Ndër vendet e prekura shfaqet edhe Shqipëria, e ilustruar me ngjyrë të kuqe në hartën e BBC-së që shoqëron këtë raport.
Dhuruesi, i cili ka mbetur anonim, filloi karrierën e tij si dhurues në vitin 2005 kur ishte student, dhe materiali i tij gjenetik është përdorur në rreth 17 vjet nga gra që kanë kërkuar ndihmë për fertilitet. Ai vetë nuk ka pasur probleme shëndetësore dhe besohet se ka kaluar të gjitha kontrollet e nevojshme për dhuruesit. Megjithatë, ADN-ja e tij kishte pësuar një mutacion para lindjes, duke ndikuar negativisht në gjenin TP53, i cili është kritik në parandalimin e zhvillimit të qelizave kancerogjene.
Sipas raportimeve, disa nga fëmijët që kanë trashëguar këtë mutacion tashmë kanë vdekur, dhe të tjerë mund të përballen me rrezik të lartë për zhvillim të kancerit gjatë jetës së tyre. BBC raporton se vetëm një numër i vogël i atyre që e kanë trashëguar mutacionin mund të mos zhvillojnë kancer. Edhe pse materiali gjenetik nuk është shitur në klinikat britanike, disa familje britanike që e kanë përdorur atë gjatë trajtimit të fertilitetit në Danimarkë janë informuar për rreziqet e mundshme.
Banka Europiane e Lëndës gjenetike në Danimarkë ka shprehur mbështetje për familjet e prekura dhe ka konfirmuar se materiali është përdorur për të krijuar shumë foshnja në disa vende. Ky hetim u zhvillua si pjesë e Rrjetit të Gazetarisë Investigative të Unionit Europian të Transmetimeve, duke nxjerrë në pah shqetësime etikë lidhur me përdorimin e materialeve gjenetike dhe rrezikun për shëndetin e fëmijëve të ardhshëm.
