Të dhëna të reja janë zbardhur lidhur me 37-vjeçarin Ilirjan Selmani, i dyshuar si autori kryesor i vrasjes së Kozeta Teços, 52 vjeçe, në Pogradec.
Burime nga hetimi bëjnë me dije se Selmani dhe viktima kishin një marrëdhënie intime që zgjaste prej rreth 8 vitesh. I riu punonte herë pas here në ndërtim dhe në Greqi, ndërkohë që rezulton të ketë qenë edhe përdorues i lëndëve të forta narkotike.
Sipas deklarimeve të afërmve të viktimës, Kozeta Teço u kishte treguar se Selmani i kishte marrë rreth 20 milionë lekë gjatë viteve, para që ajo i siguronte nga ndihma e motrave që jetonin në Greqi dhe në Tiranë.
Pas krimit, mëngjesin e së njëjtës ditë, Selmani është takuar me të njohur të tij dhe u ka deklaruar se do të ndahej nga Kozeta, duke pretenduar se ajo kishte nisur një lidhje tjetër dhe mund ta dëmtonte atë për shkak të xhelozisë.
Dëshmitarët thonë se 37-vjeçari ishte manipulues dhe kishte arritur të mashtronte shumë persona në rrethin e tij. Mësohet se ai vuante nga probleme të shëndetit mendor dhe përfitonte pagesë invaliditeti.
Sipas hetimeve, pas një konflikti të ndodhur në mëngjes në banesën e viktimës, Selmani e ka goditur Kozetën me mjet prerës, duke i shkaktuar plagë fatale në qafë dhe krah. Pas krimit, ai ka tentuar të fshijë gjurmët duke pastruar gjakun me peceta dhe bluza, të cilat më pas i ka hedhur në një kazan mbeturinash.
Lëvizjet e tij janë kapur nga kamerat e sigurisë të një biznesi pranë vendngjarjes. Policia po vijon hetimet për të dokumentuar plotësisht ngjarjen dhe për të përcaktuar motivet e sakta të vrasjes.
