Prokuroria e Tiranës ka zbardhur masat e sigurisë ndaj pesë zyrtarëve të Bashkisë Tiranë dhe tre përfaqësuesve të kompanive private, të dyshuar për “Falsifikim dokumentesh” dhe “Shpërdorim detyre” në lidhje me procesin e demolimit të një sërë pallatesh, mes tyre edhe objektin nr.140 në rrugën “Haki Stermilli”.
Hetimet tregojnë se disa ndërtesa të shembura në janar 2021 janë përfshirë sërish në dokumentacion si pjesë e punimeve të një tenderi të zhvilluar në muajt në vijim, duke krijuar punime fiktive dhe dëmtim financiar të buxhetit të Bashkisë.
Sipas të dhënave hetimore, Aurel Çuko, Aurel Boriçi dhe Eleana Guçe, me funksione drejtuese në Drejtorinë e Emergjencave Civile, akuzohen se kanë nënshkruar dokumente zyrtare të pavërteta të lidhura me procesin e dorëzimit të sheshit të punimeve dhe dokumentacionin vijues. Po ashtu, specialistët e IMT-së, Rexhina Rakipi dhe Sokol Qehajaj, dyshohet se kanë hartuar preventiva punimesh pa kryer verifikimet në terren, duke vepruar në kundërshtim me detyrën.
Në anën tjetër, përfaqësues të kompanive private Aleksandra Mahmutllari, Shyqyri Maloku dhe Fatmir Firi akuzohen për hartim dhe përdorim dokumentesh të falsifikuara, përfshirë procesverbale që paraqisnin si të kryera punime që në fakt ishin realizuar më herët ose nuk ishin zhvilluar.
Për pasojë, Prokuroria ka kërkuar masa sigurie që variojnë nga “arrest në shtëpi” për Aurel Çukon, Aurel Boriçin dhe Sokol Qehajajn, deri te “detyrim paraqitje” për Eleana Guçen, Rexhina Rakipin, Aleksandra Mahmutllarin, Shyqyri Malokun dhe Fatmir Firin. Hetimet vijojnë për sqarimin e plotë të rolit që secili prej të dyshuarve ka pasur në skemën e supozuar të falsifikimeve dhe shpërdorimit të detyrës.
