Një sfidë e organizuar për të fituar buxhetin javor u shoqërua me debate dhe mungesë bashkëpunimi mes banorëve të “Big Brother VIP 4”. Gara, e cila konsistonte në gjetjen e sa më shumë përgjigjeve për gjëegjëzat e shfaqura në living, përfundoi me një vendim penalizues nga Vëllai i Madh.
Si pasojë e sjelljes së tyre, ai vendosi t’u japë vetëm 20% të buxhetit për këtë javë. Vendimi u komunikua përmes një zarfi të zi, ku thuhej se banorët duhet të ulen së bashku, të zgjedhin liderin e ri dhe të organizojnë buxhetin bazuar në listën e dhënë brenda zarfit, brenda një ore.
“Banorë, Vëllai i Madh ka vënë re se ju nuk keni bashkëpunim dhe nuk respektoni rregullat e lojës së buxhetit. Si rrjedhojë, për këtë javë do të keni vetëm 20 për qind të buxhetit. Para se të bëni buxhetin uluni në living dhe zgjidhni liderin e ri. Brenda në zarf keni listen, keni një orë kohë”, shkruhej në zarf.
