Lulzim Visha, 48-vjeç mbeti i vrarë mëngjesin e sotëm në zonën e Zall Mnerit në Kamëz.
Trupi i pajetë i 48-vjeçarit u konstatua nga një banor i zonës, i cili lajmëroi menjëherë policinë.
Kjo është fotoja e automjetit në të cilin ndodhej Visha, pak minuta pas ekzekutimit.
Xhami i automjetit është bërë shoshë nga plumbat.
Si ndodhi ngjarja:
Ishte ora 7:40 e mëngjesit, kur një banor i zonës konstatoi se brenda një automjeti, ishte vrarë një person me armë zjarri dhe më pas lajmëroi policinë.
Viktima, i cili punonte në një postë private, ishte nisur për në punë dhe është qëlluar 200 metra larg banesës së tij.
Policia me të mbërritur në vendin e ngjarjes, arriti të gjente 12 gëzhoja në automjetin ku ndodhej viktima.
Nga dëshmitë paraprake që janë marrë në vendin e ngjarjes, banorët kanë deklaruar se nuk kanë dëgjuar të shtëna dhe kjo ka ngritur dyshimet se arma ka qenë me silenciator.
Pasi grupi hetimor mblodhi provat në vendin e ngjarjes, automjeti i cili ishte bërë shoshë nga plumbat u sekuestrua në cilësinë e provës materiale.
Fillimisht hetimet u shtrinë në pistën e gjakmarrjes pasi viktima, ishte vëllai i Besnik Vishës, emër i njohur për policinë. Ky i fundit, në vitin 1997 ka vrarë me armë zjarri Refik Domin, ngjarje e ndodhur në afërsi të Universitetit Bujqësor të Tiranës. Megjithatë, për shkak të viteve të largëta kur ka ndodhur kjo ngjarje, hetimet janë shtrirë edhe në pista të tjera.
Pas ngjarjes, autori është larguar pa lënë asnjë gjurmë me një automjet tip “Porsche” ngjyrë gri, i cili është gjetur i djegur pak orë pas ngjarjes në zonën e Zall Herrit.
Policia ndërkohë ka ngritur postblloqe në gjithë zonën e Kamzës por edhe më tej me qëllim kapjen e autorit, teksa grupi hetimor po punon ende për sqarimin e rrethanave të këtij atentati mafioz.
