Xabi Alonso ka nisur zyrtarisht aventurën si trajner i Chelsea dhe nuk e ka fshehur entuziazmin për potencialin e skuadrës së tij të re.
Trajneri spanjoll ka firmosur një kontratë katërvjeçare me klubin londinez dhe është zgjedhur për të drejtuar një projekt afatgjatë në “Stamford Bridge”, pas një sezoni zhgënjyes ku Chelsea përfundoi në vendin e 10-të në Premier League dhe mbeti jashtë Europës.
Në fjalët e tij të para, Alonso theksoi se puna e fortë dhe përkushtimi total do të jenë baza e projektit të ri.
“Nuk mund të kursesh asgjë, gjithçka duhet të jetë për skuadrën. Puna e fortë është e domosdoshme. Duhet të krijojmë këtë kulturë dhe ajo nis çdo ditë këtu në Cobham”, u shpreh Alonso.
Ish-trajneri i Real Madridit pranoi se grupi që ka në dispozicion e motivon shumë dhe se objektivi i tij është të ndërtojë një skuadër me identitet të qartë loje, që të rikthejë emocionin te tifozët.
“Potenciali i ekipit dhe i skuadrës më emocionon shumë. Dua të krijojmë një ide futbolli, të sjellim emocion në stadium dhe të lidhemi me tifozët”, deklaroi ai.
Alonso e cilësoi marrjen e drejtimit të Chelsea si një nder të madh, duke e konsideruar klubin londinez si një nga më të rëndësishmit në botë.
Trajneri spanjoll foli edhe për rëndësinë e rikthimit të lidhjes mes skuadrës dhe tifozëve, pas një periudhe të vështirë për klubin.
“E di energjinë që ka ky stadium dhe duhet ta krijojmë sërish atë lidhje. Mesazhi për tifozët është se duam ta ndajmë këtë besim: gjëra të mira do të vijnë nëse jemi të bashkuar”, tha Alonso.
Ai shtoi se kalimi në Premier League vjen në momentin e duhur për karrierën e tij, pas eksperiencave në Gjermani dhe Spanjë.
Debutimi i tij zyrtar në kampionat do të vijë në derbin londinez ndaj Fulham, ku përballë do të ketë ish-shokun e skuadrës te Liverpool, Alvaro Arbeloa, tashmë trajner i skuadrës rivale.
