Humbja 0–2 ndaj Celta Vigos ka ndezur sërish spekulimet për shkarkimin e mundshëm të trajnerit Xabi Alonso, i cili tashmë ka zhvilluar një takim me drejtuesit e Real Madridit për të diskutuar të ardhmen e tij.
Sipas El Mundo, trajneri spanjoll ka biseduar me drejtuesit e klubit për situatën aktuale dhe për hapat e mëtejshëm. Ndeshja e ardhshme kundër Manchester City-t shihet si vendimtare për të. Pozita e tij nuk është e sigurt dhe mendimet brenda klubit janë të ndara.
Së fundmi, Alonso kritikoi edhe arbitrin e ndeshjes ndaj Celta Vigos, duke thënë se vendimet e tij ishin “të pakuptueshme dhe të dobëta”, gjë që sipas tij çoi Real Madridin “në çmenduri”.
Aktualisht, Real Madridi renditet në vend të dytë në La Liga me 36 pikë pas 16 javësh, katër pikë larg kryesuesve të kampionatit.
