Trajneri i Real Madridit, Xabi Alonso, doli sot në konferencë për shtyp përpara “El Clásico”-s së shumëpritur ndaj Barcelonës, duke folur me qetësi, vendosmëri dhe vetëbesim për sfidën që e pret skuadrën e tij.
“Nesër e dimë çfarë duhet të bëjmë. Kemi studiuar lojën dhe kemi analizuar ndeshjet e vitit të kaluar për të kuptuar çfarë nuk shkoi mirë, por nesër është ndryshe – është një projekt i ri”, tha Alonso, duke nënvizuar se skuadra e tij është në fazë ndërtimi, por me synime të qarta.
I pyetur për komentet e Lamine Yamal, i cili ndezi polemika në prag të ndeshjes, trajneri madrilen u tregua i matur:
“Fjalët e Lamine? E rëndësishme është ajo që ndodh në fushë, kaq.”
Sa i përket formacionit, Alonso nuk dha detaje:
“Trent apo Carvajal nga minuta e parë? Çdo lojtar që është në skuadër mund të luajë. Ne përgatitemi si grup.”
Trajneri vuri theksin te aspekti taktik dhe qasja në lojë, duke treguar se Real Madrid po kërkon të shfrytëzojë çdo mundësi ndaj Barcelonës:
“Nuk mjafton të përfitosh nga linja e lartë e Barcelonës. Duhet të arrijmë më parë në ato pozicione që na lejojnë të japim pasimin final pas mbrojtjes së tyre.”
Pas humbjeve me PSG dhe Atleticon, Alonso tha se motivimi është më i madh se kurrë:
“Nuk dua të dëshmoj asgjë. Dua vetëm të fitojmë nesër dhe të bëjmë tifozët tanë të lumtur.”
Ai shtoi se skuadra ka reflektuar pas dështimeve:
“Po përmirësohemi – taktikisht, futbollistikisht, në sjellje – në çdo drejtim. Nuk i analizojmë ndeshjet vetëm nga rezultati, por nga procesi. Po ndërtojmë një bazë të fortë, por duhet të bëjmë hapin e radhës dhe të luajmë më mirë.”
Në fund, Alonso theksoi se “El Clásico” mbetet gjithmonë një ndeshje e veçantë:
“Nuk ka rëndësi kush çfarë thotë. Kjo ndeshje është gjithmonë e zjarrtë dhe lojtarët janë gati për intensitetin që kërkon.”
El Clásico do të zhvillohet nesër, në një atmosferë të mbushur me pritshmëri, emocione dhe tension, ku Xabi Alonso kërkon të tregojë se projekti i tij te Real Madrid po hyn në një fazë të re.
