Ilirianews.al ka siguruar foton e autorit që vrau me armë zjarri Ardian Baloshi, në zonën e Kamzës në Tiranë.
Pas ngjarjes Sadik Llanaj, u largua nga vendngjarja me automjet ndërsa raportohet se është i armatosur.
I riu ka ndërruar jetë rrugës për në spitalin e Traumës, atje ku është dërguar nga kalimtarë të rastit.
Kështu bëri me dije drejtori i komanduar i Policisë Tiranë, Oliger Torba.
“Rreth orës 11:30 në spitalin e Traumës është paraqitur pa shenja jete 27 vjeçari Ardian Baloshi. Ka pasur plagë të shkaktuar me armë zjarri. Duke marrë parasysh rrezikshmërinë e autorit të dyshuar, janë aktivizuar edhe forcat RENEA. Ngjarja ka ndodhur në rrugë, të dy banorë të zonës. Autori ka qenë me automjet, ndërsa viktima ka ndërruar jetë rrugës për në spital. E kanë çuar kalimtarë të rastit”, deklaroi ai shkurtimisht nga vendi ku ka ndodhur krimi.
Për kapjen e autorit, rreth 39 vjeç, janë aktivizuar edhe forcat RENEA, ndërsa dyshohet se ai ndodhet ende në zonë.
Duhet theksuar po ashtu se janë ngritur pika kontrolli në akset kryesore rrugore, janë angazhuar forca të shtuara policore në terren dhe po zhvillohen kontrolle intensive për lokalizimin dhe kapjen e tij.
