Eksperti i Sigurisë, Shemsi Prençi ishte i ftuar ditën e sotme në emisionin “Shqipëria LIVE”, ku ka folur për vrasjen e 14-vjeçarit Martin Cani. Ai ka bërë një deklaratë të fortë, duke hedhur poshtë lajmet që kanë qarkulluar së fundmi për një tjetër të mitur, që ishte i përfshirë në ngjarje. Teksa u raportua se ky i mitur, djali i një oficeri të BKH-së, u vetëdorëzua dje në polici pasi ishte fshehur gjithë këtë kohë, Prençi ka deklaruar se kjo nuk është e vërtetë. Ai tha 14-vjeçarin e ka dorëzuar i ati ditën e ngjarjes në polici, madje me xhupin e grisur, direkt pas ngjarjes. Ai po ashtu ka thënë se një ish-deputet ka dashur të marrë në mbrojtje autorin e vrasjes, për shkak se kishin të njëjtën origjinë.
“Policia në komunikatën ditore është përpjekur ta manipulojë ngjarjen. Kanë thënë ngjarja ka ndodhur 200-300 metra larg shkollës, kur në fakt ka ndodhur vetëm 30 metra larg murrit të shkollës. Duhet të arrijnë deri tek manipulimi i vendngjarjes për ta larguar sa më shumë larg institucioneve. Oficeri i parë që ka shkuar në vendngjarje ka treguar seriozitet duke e mbajtur të saktë dhe të plotë procesverbalin për ngjarjen, ai ka treguar se në sherr ishin përfshirë 7 deri në 8 persona.
Roli që ka pasur secili prej tyre në këtë ngjarje do të mësohet me anë të hetimit, jam i bindur. Sipas informacioneve që kam unë, nga dëshmitë që janë marrë deri tani, edhe personi që është plagosur është protagonist. Edhe ai që është në spital tani ka pasur rol të rëndësishëm në ngjarje, për të mos thënë që është personi që ka nisur ngatërresën, goditjen i pari. Ndërkohë, person i që është përgojuar një 14-vjeçar, se ne nuk duhet t’i paragjykojmë këta 14-vjeçarë, nuk duhet ta shtojmë dhimbjen por duhet të dalë e vërteta. E vërteta, sipas informacioneve që kanë dalë deri më tani, është se një prind, që është oficer i BKH-së, që ka pasur djalin të përfshirë në ngjarje, pavarësisht rolit që ka pasur, ka marrë iniciativën dhe e ka dorëzuar ashtu me xhup të grisur, e ka dorëzuar në polici. Pra nuk e ka fshehur, është treguar i përgjegjshëm në këtë rast, dhe për këtë të garantoj, është treguar dhe prind dhe oficer i përgjegjshëm. E ka dërguar në zyrën e zëvendës-drejtorit të Policisë së Tiranës.
‘Djali im ka qenë pjesë, ka qenë në grup atje ku u zunë. Për rolin, pyeteni vetë’- mësohet se ka thënë dhe po ashtu, nuk ka pranuar as të jetë prezent. Madje ka thënë edhe se ‘nëse djali im është përgjegjës dhe ka ndikuar apo ka një rol, mbajeni këtu. Në të kundërt, ju duhet t’i thoni të vërtetën opinionit publik, sepse djali im, nuk duhet të tregohet me gisht si kriminel’.
Por është dhe një fakt tjetër, që është ushtruar presion për manipulimin e ngjarjes. Është ushtruar nga një ish-deputet, i cili ka dashur të marrë në mbrojtje, për shkak të origjinës, autorin e ngjarjes.“- tha ai.
