Ngjarja e rëndë e mbrëmjes së sotme në Sarandë, ku u ekzekutua me plumb në kokë biznesmeni dhe drejtuesi i Shoqatës “Çamëria”, Rexhep Ismaili, ka sjellë reagime të shumta.
Deputeti i Partisë Socialiste, Ardit Bido, ka shprehur dhimbjen e tij për humbjen e Ismailit, duke e cilësuar atë si një figurë të respektuar në komunitet.
Në reagimin e tij, Bido shkruan:
“I kobshëm lajmi i vrasjes së Rexhep Ismailit. Kryefamiljar që rriti një familje të mirë, biznesmen i suksesshëm, patriot dhe drejtues i zellshëm i Shoqatës Çamëria në Sarandë. Humbja e tij trondit jo vetëm familjen dhe miqtë, por mbarë komunitetin. I bëj thirrje Policisë së Shtetit dhe Prokurorisë që të zbardhin sa më parë këtë ngjarje të rëndë dhe autorët të përballen me drejtësinë. Ngushëllimet më të sinqerta familjes, të afërmve dhe gjithë atyre që e njohën. Lamtumirë Rexhep!”
Kujtojmë se ngjarja ka ndodhur rreth orës 22:00 përpara karburantit “Vëllezërit Ismaili”, në kryqëzimin apo rrethrrotullimin e Gjashtës. Sipas informacioneve paraprake Rexhep Ismaili është konfliktuar me disa persona dhe njëri prej tyre ka nxjerrë armën e zjarrit duke e qëlluar me një plumb në kokë.
