Fëmijët e 36-vjeçares, Marjola Nakoleci në Volos mëngjesin e së premtes, u përballën me një skenë të tmerrshme, ku i ati goditi për vdekje me thikë nënën e tyre.
Ishte vajza 16-vjeçare e çiftit, e cila informoi policinë se babai i saj e kishte goditur me thikë nënën e saj brenda shtëpisë së tyre. Ndërkohë, ditën e sotme vajza e 36-vjeçares ka bërë një postim prekës në rrjetet sociale, duke i thënë lamtumirë së ëmës.
“Ike, mami im, do të më mungosh shumë. E di që po na sheh atje lart, por Dinosi, unë, Bleta dhe Asimina të duam shumë. Je gjithmonë në jetën tonë”, shkroi vajza krahas fotove me nënën e saj.
Oficerët e policisë mbërritën menjëherë në vendngjarje dhe gjetën trupin e gruas fatkeqe në hyrje të pallatit me lëndime në qafë dhe brinjë dhe fëmijët e mitur ishin pranë saj. Ndërkohë autori 40-vjeçar, Pandeli Nakoleci mbetet i zhdukur, pasi ai u arratis menjëherë pas sulmit ndaj 36-vjeçares.
Sipas policisë greke, nuk kishte histori dhune në familje midis çiftit, megjithatë, i kërkuari ishte i njohur për autoritetet, pasi ishte akuzuar, ndër të tjera, për pjesëmarrje në një organizatë kriminale dhe për shkelje të ligjit të drogës.
Në të njëjtën kohë, në qershor, vrasësi i gruas u transferua me urdhër të prokurorit për një ekzaminim psikiatrik, pasi kishte tentuar vetëvrasje. Gjatë ekzaminimit, u përcaktua se ai kishte nevojë për shtrim në spital.
