Shefja e Komisionit Evropian, Ursula Von der Leyen, ka qenë e para që ka dhënë një reagim publik para bisedës virtuale ditën e sotme me Shtëpinë e Bardhë dhe presidentin ukrainas Zelensky.
“Nevojiten garanci të forta sigurie. Kufijtë ndërkombëtarë nuk mund të ndryshohen me forcë. Një takim trepalësh është i rëndësishëm. Qoftë armëpushim apo marrëveshje paqeje, mjafton për t’i dhënë fund masakrës”, tha ajo mes të tjerash, në një konferencë që mbajti në Bruksel bashkë me presidentin ukrainas.
Kryekomisionerja vuri theksin te garancia e sigurisë që duhet të japë Kremlini dhe mbi të gjitha përjashton marrjen e territoreve në tavolinë.
“Nevojiten garanci të forta sigurie. Bashkimi Evropian është gati të bëjë pjesën e vet”, deklaroi Ursula von der Leyen. “Kufijtë ndërkombëtarë nuk mund të ndryshohen me forcë. Vendimet në lidhje me Ukrainën nuk mund të merren pa Kievin. Vetëm Ukraina mund të zgjedhë dhe të formësojë fatin e saj. Ne jemi gati të forcojmë sanksionet kundër Rusisë”.
Më tej ajo inkurajoi Ukrainën që të tregohej si një “koracë çeliku” ndaj Moskës në frontin e luftës.
“Nuk duhet të ketë kufizime për forcat e armatosura të Ukrainës, as kufizime në bashkëpunimin me vendet e treta ose marrjen e ndihmës nga vendet e treta. Ukraina duhet të jetë një koracë çeliku. Garancitë e sigurisë duhet të jenë në vend për interesat e Ukrainës dhe të Evropës”, shtoi ajo.
Presidentja e Komisionit të BE-së e bëri deklaratën në një konferencë shtypi me Presidentin ukrainas Volodymyr Zelensky, në Bruksel.
