Policia e Vlorës ka zbardhur 6 vjedhje të kryera në Dukat, Radhimë dhe Orikum dhe ka vënë në pranga 2 autorët e dyshuar.
Ruloti i vjedhur që u gjet i fshehur në banesën e njërit prej autorëve është sekuestruar.
Policia njofton se në kuadër të operacionit të koduar “Rulot,” u vunë në pranga shtetasit: J. S, 26 vjeç, banues në Orikum, G. G., 38 vjeç, banues në Dukat.
Nga veprimet hetimore dyshohet se këta shtetas, më datë 14.12.2024, në fshatin Dukat, kanë vjedhur një shumë prej 700 euro dhe 25,000 lekë në banesën e shtetases R. I, si dhe një rulot ( camper) në pronësi të shtetasit A. C, i cili u gjet dhe u sekuestrua gjatë kontrollit të banesës së shtetasit G. G.
Gjithashtu, nga hetimet ka rezultuar se këta shtetas dyshohen si autorë të 4 vjedhjeve të tjera të kryera gjatë 3 muajve te fundit, konkretisht: Vjedhje të disa koshereve të bletëve në Radhimë dhe Llogara dhe vjedhje të disa bagëtive në Radhimë dhe Orikum.
Materialet procedurale i kaluan Prokurorisë, për veprime të mëtejshme.
