Policia e Vlorës ka arrestuar 11 anëtarët e një grupi kriminal që shiste kokainë dhe kanabis me doza të përgatitura, kryesisht në Sarandë dhe Delvinë. Operacioni i koduar “Rrjeti” ka çuar në ekzekutimin e masave të sigurisë “Arrest në burg” për shtetasit Mili Hamzaj, Evinio Hamzaj, Fatjon Abazi, Osmën Abazi, Xhuljan Meçani, Stelio Meçani, Eduart Taka, Juxhin Isufi, Drago Qëndro, Enver Haxhi dhe Mina Dedi.
Gjatë operacionit, policia ka sekuestruar 120 doza kokainë, doza kanabisi, 18 telefona celularë, 4 automjete, 2 motomjete, 2 radio si ato të Policisë, 2 peshore elektronike dhe një shumë parash të dyshuar të përfituara nga ky aktivitet kriminal, që arrin vlerën 40,000 euro, 2,980 dollarë, 260 paund dhe 1,940,000 lekë. Po ashtu, u arrestua edhe një person tjetër, Algert Caushi, për prodhimin dhe shitjen e narkotikëve dhe mbajtjen pa leje të armëve të ftohta.
Policia njoftoi se operacioni ka pasur mbështetje nga Forcat e Ndërhyrjes së Shpejtë Fier dhe Forca e Posaçme Shqiponja në DVP Vlorë, dhe vazhdon hetimi për të identifikuar dhe kapur anëtarë të tjerë të përfshirë në aktivitetin kriminal.
