Pamje të reja nga kamerat e sigurisë kanë hedhur dritë mbi ngjarjen e ndodhur mbrëmjen e djeshme në lagjen “Uji i Ftohtë” në Vlorë, ku dy 32-vjeçarë mbetën të plagosur pas një sherri të dhunshëm me thika.
Në video duken qartë dy të rinjtë që konfliktohen fizikisht në afërsi të rrethrrotullimit të Skelës, ndërsa nuk shihet asnjë kalimtar që të ndërhyjë gjatë përplasjes. Pamjet konfirmojnë se sherri ka qenë i përqendruar vetëm mes dy personave dhe ka eskaluar në dhunë brenda pak sekondash.
Ngjarja ndodhi rreth orës 21:30 dhe dy të rinjtë të përfshirë u dërguan menjëherë në spital, ku ndodhen jashtë rrezikut për jetën. Sipas burimeve nga policia, sherri dyshohet të ketë nisur për motive të dobëta.
Grupi hetimor ka sekuestruar pamjet filmike dhe vijon me marrjen e dëshmive për të zbardhur plotësisht shkaqet dhe rrethanat e konfliktit. Deri tani, asnjë prej të rinjve nuk është ndaluar zyrtarisht, ndërsa priten konkluzionet e hetimit./bw
