Të paktën pesë persona kanë humbur jetën dhe gjashtë të tjerë janë shpallur të zhdukur pas një shpërthimi të fuqishëm në një fabrikë kimike në Kinën lindore, të martën, sipas autoriteteve lokale.
Shpërthimi shkaktoi një re të madhe tymi që u ngrit në qiell dhe dëmtoi dritaret e ndërtesave.
Incidenti ndodhi në punishten e kompanisë Shandong Youdao Chemical në qytetin Gaomi, në provincën Shandong, pak para mesditës me orën lokale, raportoi televizioni shtetëror CCTV. Nuk është dhënë ndonjë shkak për shpërthimin.
Autoritetet lokale deklaruan se edhe 19 persona të tjerë kanë pësuar lëndime të lehta.
Pamjet që qarkullojnë në rrjetet sociale kineze tregojnë ndërtesa të mbuluara nga tymi në një park industrial, ndërsa disa ndërtesa me kate të ulëta në afërsi kishin dritare të thyera.
Shërbimet vendore të zjarrfikësve dhe shpëtimit dërguan në vendngjarje 55 automjete dhe 232 persona, ndërsa Ministria e Menaxhimit të Emergjencave dërgoi një grup pune dhe përforcime shpëtimi.
Një punonjëse në një hotel rreth 3.5 kilometra larg shpërthimit tha se e dëgjoi shpërthimin rreth mesditës.
“Zëri ishte shumë i fortë, si një ‘boom’. Zgjati vetëm një moment,” i tha ajo CNN-it, duke shtuar se hoteli nuk pësoi dëmtime.
Një tjetër punëtore në një fabrikë rreth 6 kilometra larg vendit të shpërthimit tha se ndjeu një “goditje” dhe një “erë të fortë”.
“Nje rrjedhë e fuqishme ajri më frikësoi aq shumë sa nuk guxova të dal nga zyra,” tha ajo. “Dyert dhe dritaret e fabrikës time u dëmtuan… ajri u fut me vrull nga dritarja, dhe po të isha pak më afër, mund të më kishte përplasur pas murit.”
