Presidenti rus, Vladimir Putin, ka hapur për herë të parë dyert e rezidencës së tij private në Kremlin për publikun.
Në një video të publikuar, Putin përshëndet gazetarin dhe propagandistin Pavel Zarubin përpara hyrjes së apartamentit të tij, i cili ndodhet afër zyrës së tij në kompleksin presidencial. “Po, ky është një apartament. Siç mund ta shihni, nuk është larg,” tha Putin, duke e ftuar Zarubinin të hynte brenda.
Pamjet tregojnë një sallë luksoze, të pajisur me pasqyra të mëdha me korniza ari, llambadarë kristali dhe bimë ekzotike. Një portret i carit Aleksandër III qëndron mbi një tavolinë, ndërsa hapësira është e zbukuruar me divane të mëdhenj. Përveç kësaj, pranë një dritareje vihet re një piano e bardhë, e cila, sipas Putinit, luhet rrallë.
Në një fragment tjetër të intervistës, e cila do të transmetohet më 4 maj, Putin tregon një bibliotekë të dekoruar me panele druri të errët, dy dhoma gjumi dhe madje një kishëz, duke u shfaqur më shumë rreth jetës së tij private.
Kjo intervistë erdhi pas një deklarate të Putin në mars 2023, ku ai zbuloi se një pjesë e takimit të tij me presidentin kinez Xi Jinping ishte zhvilluar pikërisht në këtë apartament. Ai kishte theksuar se kishte kaluar shumë kohë në këtë hapësirë, duke punuar dhe kaluar netët e fundit atje.
Ndërkohë, pamjet e reja të luksit të këtij apartamenti vijnë pas polemikave që kanë pasuar lidhur me pallatin e supozuar të Putin në Gelendzhik, i cili, sipas disa hetimeve të bëra nga Fondacioni Kundër Korrupsionit, ka një vlerë prej një miliard eurosh. Kremlini ka mohuar se pallati i përkiste Putin, duke thënë se ai ishte pronë e mikut të tij të fëmijërisë, Arkady Rotenberg, i cili ka pohuar se po zhvillonte një hotel luksoz atje.
