Prej disa ditësh, rrjetet sociale dhe mediat online janë pushtuar nga një video e pazakontë që tregon një episod të çuditshëm mes presidentit francez Emmanuel Macron dhe bashkëshortes së tij, Brigitte. Pamjet janë regjistruar në aeroportin e Hanoit, në nisje të turneut aziatik të presidentit francez, dhe kanë ngjallur polemika të shumta.
Presidenti Macron, në një koment për gazetarët, u përpoq të zbuste situatën: “Po ngacmohesha e po bëja shaka me bashkëshorten time, por videoja është kthyer në një lloj katastrofe gjeoplanetare. Në një botë si kjo ku jetojmë, nuk kemi kohë për të humbur me tema të tilla”, tha ai me ironi.
Megjithatë, për të hedhur më shumë dritë mbi atë që ndodhi, britanikja Express angazhoi një ekspert të lexim-buzëve për të analizuar komunikimin mes çiftit në video.
Sipas analizës së ekspertit, ndërsa dera e avionit hapet dhe çifti shfaqet në sy të stafit dhe kamerave, Brigitte e shtyn lehtë në fytyrë Macron-in. Ai duket i zënë në befasi dhe me një përshëndetje të sforcuar thotë: “Bonjour”.
Më tej, eksperti vëren një ftohtësi në sjelljen e Brigitte-s: Macron i zgjat dorën, por ajo nuk ia pranon dhe mbahet për parmakun, duke kaluar pranë tij. Sipas leximit të buzëve, ajo i pëshpërit: “Dégage, espèce de loser” (“Largohu, humbës i mjerë”).
Presidenti përpiqet ta qetësojë situatën me fjalët: “Essayons, s’il te plaît” (“Të përpiqemi, të lutem?”), por Brigitte i përgjigjet shkurt: “Jo”. Ai mbyll bisedën me një shprehje të përmbajtur në fytyrë dhe fjalët: “Je vois” (“E kuptoj”).
Ky episod i filmuar u bë menjëherë lajm ndërkombëtar dhe ngriti pikëpyetje mbi natyrën e marrëdhënies mes çiftit presidencial francez. Ndërsa Macron e minimizon si një moment shakarash, interpretimet dhe komentet në publik vazhdojnë të jenë të ndryshme.
