Kandidati për drejtimin e SPAK, Elvin Gokaj, prezantoi platformën e tij para Këshillit të Lartë të Prokurorisë, duke e bazuar garën në përvojën e tij 26-vjeçare në sistemin e drejtësisë.
Ai theksoi se SPAK duhet të mbetet institucioni kyç i luftës kundër korrupsionit në nivele të larta dhe krimit të organizuar dhe se synimi i tij nuk është thjesht marrja e një detyre, por marrja e përgjegjësisë maksimale për drejtimin e strukturës.
Ai shpjegoi se veprimtaria e tij do të fokusohet në shtyllat kryesore: luftën kundër korrupsionit dhe krimit të organizuar, konsolidimin e institucionit përmes përmirësimit të strukturës dhe shtimit të kapaciteteve njerëzore, forcimin e bashkëpunimit me partnerët ndërkombëtarë dhe rritjen e besimit të publikut.
Përpara zbatimit të këtyre masave, Gokaj planifikon të nisë me një analizë të plotë dhe objektive të situatës aktuale të burimeve njerëzore, strukturës organizative dhe ngarkesës së punës, duke synuar ta udhëheqë SPAK-un drejt një faze të re pjekurie dhe efikasiteti.
Elvin Gokaj: Platforma ime bazohet në një përvojë 26-vjeçare në sistemin e drejtësisë. SPAK duhet të mbetet institucioni kyç i luftës kundër korrupsionit në nivele të larta dhe krimit të organizuar. Sot qëndroj para jush jo thjesht për të këruar një detyrë, por për të marrë përgjegjësi. Premtoj të marr këtë detyrë me modesti dhe përgjegjësi maksimale. Mandati i drejtuesit të ri mbështet në themele të konslodiaur nga ana e drejtuesve të mëparshëm të kësaj strukture.
Gjatë ushtrimit të detyrës kam hetuar dhe çuar për gjykim çështje me rrrezikshmëri të lartë shoqërore. Kam hetuar çështje të zyrtarëve të lartë publikë, të pushtetit lokal dhe qendror. Veprimtaria ime do të fokusohet në këto shtylla kryesore; në luftën kundër korrupsionit dhe krimit të organizuar, në konsolidimin e institucionit përmes përmirësimit të strukturës dhe shtimit të kapaciteteve njerëzore, forcimit të bashkëpunimit me partnerët ndërkombëtarë dhe në forcimin e besimit të publikut. Këto prioritete përfaqësojnë angazhimin tim për ta udhëhequr këtë institucion deri në një fazë të re pjekurie. Përpara zbatimit të këtyre masave, drejtimi i ri i SPAK do të nisë me një analizë të plotë dhe objektive të situatës aktuale të burimeve njerëzore, strukturës organizative dhe ngarkesës së punës.
