3 ditë para zgjedhjeve parlamentare të 11 majit, qeveria zyrtarizoi faljen e penaliteteve të vendosura nga Janari 2015 deri në Nëntor 2024. Vendimi është vijim i zbatimit të ligjit të miratuar në kuvend në dhjetor të vitit të kaluar dhe nga kjo e mërkurë ka hyrë në fuqi.
Vendimi parashikon të gjitha penalitetet e vendosura nga 6 inspektoriate të ndryshme, ku përfshihen gjobat e vendosura nga inspektoriatet vendore dhe ai kombëtar i mbrojtjes së territorit, nga policia e shtetit dhe ajo bashkiake, nga inspektoriati kombëtar i ushqimit dhe ai shëndetësor.
Konkretisht përfitues janë ata që janë gjobitur për ndërtim të paligjshëm për strehim individual, në qytet ose në fshat dhe janë gjobitur nga IKMT, policia e shtetit apo ajo bashkiake.
Në këtë falje nuk përfshihen gjobat për shkeljet rrugore.
Do të falen gjobat e vendosura nga AKU në subjektet agro-përpunuese në zonat rurale, si dhe penalitetet nga inspektoriati shëndetësorë për masat anti-Covid
Përfitues janë individët, por edhe ato biznese që janë me statusin person fizik apo juridik që ushtrojnë veprimtarinë e tyre në fshat apo qytet.
Në bazë të vendimit, i cili mban firmën e katër ministrave, atij të brendshëm të bujqësisë, të shëndetësisë si dhe të pushteti vendor, tashmë të gjithë inspektoriatet do të hartojnë listat me individët dhe bizneset përfitues brenda 30 ditëve.
