Në një periudhë kur tensionet në Ballkan vazhdojnë të jenë të pranishme, ish-ambasadori amerikan në Serbi, Christopher Hill ka bërë një deklaratë mbi rolin e Shteteve të Bashkuara në rajon, konkretisht mbi normalizimin e marrëdhënieve Serbi-Kosovë.
Në një intervistë për Radion Evropa e Lirë, Hill tha se rajoni nuk duhet të presë një ndërhyrje të drejtpërdrejtë apo vendimtare nga SHBA-ja, siç ka ndodhur në të kaluarën pasi vëmendja globale është zhvendosur në zona të tjera më urgjente, si Lindja e Mesme dhe Ukraina.
“Ballkani mbetet ende një çështje e pazgjidhur në kontinentin evropian, por zgjidhjet nuk mund të imponohen nga jashtë, ato duhet të vijnë nga vetë rajoni,” – tha Hill.
Ai shpreh qartë se Kosova duhet të ndërmarrë hapa konkretë për themelimin e Asociacionit të komunave me shumicë serbe, ndërsa e pranon se edhe Serbia ka detyra të veta për të përmbushur.
