Një gjykatë në Madrid ka dënuar me burg me kusht katër persona për një krim urrejtjeje të kryer ndaj sulmuesit brazilian të Real Madridit, Vinícius Jr.
Rasti daton në janar 2023, kur para një ndeshjeje të Kupës së Mbretit kundër Atlético Madrid, një kukull me ngjyrë, e veshur me fanellën me numër 20 të lojtarit, u var në një urë pranë qendrës stërvitore të Real Madridit, shoqëruar me një banderolë ku shkruhej: “Madridi e urren Realin”.
Sipas deklaratës së LaLiga-s, një nga të pandehurit është dënuar me 15 muaj burg për krim urrejtjeje dhe me 7 muaj të tjerë për kërcënime, pasi kishte postuar imazhe të aktit në rrjetet sociale. Tre të pandehurit e tjerë morën nga 14 muaj burg (7 për krim urrejtjeje dhe 7 për kërcënime). Të katërtit nuk do të vuajnë dënimin fizikisht, pasi kanë pranuar fajin dhe kanë nënshkruar një kërkesë ndjese publike drejtuar Vinícius Jr., Real Madridit, LaLiga-s dhe Federatës Spanjolle të Futbollit (RFEF).
Në kuadër të dënimit, i pandehuri që shpërndau pamjet në rrjet mori një ndalim 4 vjet e 3 muaj për të punuar në mjedise të arsimit, sportit ose aktiviteteve për të rinj. Të tjerët u ndaluan për 3 vjet e 7 muaj. Po ashtu, gjykata urdhëroi një ndalim prej 1,000 metrash nga lojtari, shtëpia apo vendi i tij i punës dhe ndalimin e hyrjes në stadiume gjatë ndeshjeve të LaLiga-s ose nën organizimin e RFEF.
Të gjithë të pandehurit do të duhet të ndjekin një program edukativ mbi barazinë dhe mosdiskriminimin në mënyrë që pezullimi i dënimit me burg të mbetet në fuqi.
Vinícius Jr. nuk ka komentuar ende publikisht për vendimin e gjykatës.
