Një pjesëtar i forcave të armatosura britanike ka humbur jetën këtë mëngjes në Ukrainë, pas plagëve të marra në një incident tragjik që ndodhi gjatë një ushtrimi të forcave ukrainase. Sipas “Sky News”, ushtari po vëzhgonte testimet e një kapaciteti të ri mbrojtës, në një zonë të largët nga vija e frontit.
“Me shumë keqardhje duhet të njoftojmë se një anëtar i Forcave të Armatosura të Mbretërisë së Bashkuar ka ndërruar jetë në Ukrainë këtë mëngjes, të martën, më 9 dhjetor,” tha një zëdhënës i Ministrisë së Mbrojtjes britanike.
Sipas autoriteteve, incidenti ndodhi gjatë një operacioni vëzhgimi rutinë dhe nuk kishte lidhje direkte me luftime. Familja e ushtarit është njoftuar ndërsa Ministria e Mbrojtjes ka nisur hetimet për të sqaruar rrethanat e ngjarjes.
Qeveria britanike ka konfirmuar më herët se një “numër i vogël personeli” ndodhet në Ukrainë për trajnime dhe bashkëpunim teknik me ushtrinë ukrainase. Rezultatet e hetimeve pritet të publikohen në ditët në vijim.
