Ambasada Amerikane në Shqipëri ka reaguar për herë të parë në lidhje me zgjedhjet parlamentare të 11 majit, duke uruar popullin shqiptar. Me anë të një postimi në Facebook, ambasada shkruan se presin të vazhdojnë partneritetin e ngushtë me Shqipërinë.
“Urojmë popullin e Shqipërisë për zgjedhjet parlamentare dhe presim të vazhdojmë partneritetin tonë të ngushtë me Shqipërinë”, shkruan ambasada.
Ky reagim i ambasadës amerikane vjen 17 ditë pas mbajtjes së zgjedhjeve, ku Partia Socialiste nën drejtimin e Edi Ramës fitoi 83 mandate, ndërsa Partia Demokratike-Aleanca për Shqipërinë Madhështore nën drejtimin e Sali Berishës mori 50 mandate.
Tre mandate mori Partia Socialdemokrate, dy mandate Partia Mundësia dhe nga një mandat Nisma Shqipëria Bëhet dhe Lëvizja Bashkë.
Kujtojmë që kryeministrin Edi Rama e kanë uruar për fitoren ne zgjedhjet e 11 majit shumë lider të Bashkimit Evropian.
