Banorët e fshatit Kraps, në Fier, janë përballur prej vitesh me një problem të madh infrastrukturor; urën e vetme që lidh komunitetin e tyre. Kjo urë, e ndërtuar nga banorët vetë 20 vjet më parë, është në një gjendje të rënduar dhe rrezikon shembjen. Ajo shërben si lidhje për rreth 100 banorë, shumica e të cilëve janë emigrantë, dhe pa të, ata do të izoloheshin nga qendra e fshatit, tokat dhe varrezat.
Banorët theksojnë se e kanë ndihmuar për ndërtimin e urës duke mbledhur shpenzimet nga dy fise të fshatit, por tani ata nuk kanë më burime financiare për ta riparuar atë. Ura, e vendosur mbi lumin Gjanica, bëhet e pa kalueshme gjatë dimrit për shkak të prurjeve të rritura, dhe për më tepër, nuk ka mbajtëse anësore, duke rritur rrezikun për fëmijët që shkojnë në shkollë.
Ata kanë bërë disa ankesa në njësinë administrative, për të cilat kanë marrë premtime nga autoritetet se do të merret një vendim. Administratori i Njësisë Administrative Portëz, Zenel Selimaj, ka konfirmuar se është në dijeni të këtyre ankesave dhe se ka bërë kërkesë për riparimin e urës pranë Bashkisë së Fierit. Ai përmendi se pas zgjedhjeve, topografët e bashkisë kanë bërë matjet për një projekt të ri.
Në një prononcim, Arjan Ndreu, drejtori i ndërmarrjes së shërbimeve publike në bashkinë e Fierit, tha se do të ndërmerren masa për riparimin e urës dhe se po punojnë për ndërtimin e një ure të re, brenda standardeve, e cila do të mundësojë kalimin e automjeteve të tonazhit të rëndë. Sidoqoftë, zbatimi i këtij projekti varet nga buxheti i vitit të ardhshëm dhe mundësia e tenderimit.
Megjithatë, vetëm 24 orë pas këtij premtimi, punëtorët e bashkisë filluan punën për riparimin e urës, duke sjellë një shpresë për banorët e Krapsit që prej vitesh përballen me këtë situatë kritike.
