Pedagogia Elsa Skënderi, e ftuar në emisionin “Kjo Javë” në News24, ka vlerësuar si një hap pozitiv dhe të vonuar nismën për krijimin e një “Universiteti për të Moshuarit”.
Ajo theksoi se personat mbi 50 vjeç kanë nevojë të integrohen më mirë në shoqëri dhe të shmangin izolimin e vetminë, që shpesh çon në probleme me shëndetin mendor. Sipas Skënderit, një nismë e tillë jo vetëm që ndihmon në përmirësimin e cilësisë së jetës, por edhe shfrytëzon eksperiencën jetësore të këtij grupi.
Ajo e cilësoi modelin si të suksesshëm, duke marrë shembull praktikat pozitive që vijnë nga Franca dhe Europa.
Pedagogia Elsa Skënderi: Nisma për një universitet për të moshuarit është për t’u lavdëruar. Çdo gjë që sjell vëmendjen tek komuniteti i të moshuarve është për t’u lavdëruar. Në tranzicionin tonë të gjatë nuk është se kemi bërë gjithçka për këtë komunitet. Në pikëpamje të politikave sociale, nuk kemi treguar vullnet për të trajtuar këta individë.
Nisma ofron një lloj trajnimi që personat 50 vjeç e lart të integrohen dhe të shmanget vetmia. Ne kemi një shprehje që duhet të mësojmë gjithë jetën dhe kjo është e vërtetë, që mos kenë probleme me shëndetin mendor, që të themi se është shtuar në vitet e fundit. Nisma është themeluar në Francë dhe ka praktika shumë të mira. Do ishte diçka fantastike, sepse 50-vjeçarët përpos se dijeve që do thithin, kanë edhe eksperiencën mbi supe.
