Paris Jackson ka shprehur kritika të forta ndaj filmit biografik të ardhshëm për babanë e saj, Michael Jackson, duke pretenduar se ajo është “zero përqind e përfshirë” në projekt. Komentet e saj vijnë pas pohimeve të aktorit Colman Domingo, i cili luan rolin e Joe Jackson në film, i cili lavdëroi kontributin e Paris-it gjatë një eventi në Festivalin e Filmit në Venecia. Domingo tha se ajo ka qenë “e dashur dhe e ngrohtë” me të, por Paris e mohoi këtë duke shprehur indinjatën e saj në Instagram.
Ajo shkruan se ishte e angazhuar vetëm në versionet e para të skenarit dhe ofroi disa komente që ata nuk i morën parasysh. Pas kësaj, ajo vendosi të tërhiqet nga projekti, duke përmendur se nuk është filmi i saj dhe se ata do të bëjnë çfarë të duan. Paris theksoi se një pjesë e madhe e filmit është e orientuar drejt tifozëve të babait të saj, të cilët jetojnë në një “fantazi”, dhe u shpreh se ata do të jenë të lumtur me prodhimin.
Artistja kritikoi gjithashtu modelin e filmave biografikë në Hollywood për pasaktësi dhe gënjeshtra, duke thënë se kjo sipërmarrje nuk e përfaqëson atë. “Shkoni, shijoni. Bëni ç’të doni. Më lini jashtë kësaj,” shtoi ajo, duke shprehur dëshirën për të qëndruar e distancuar nga projekti.
Ky film, i cili është në zhvillim që nga viti 2019 dhe është prodhuar në bashkëpunim me trashëgimtarët e familjes Jackson, ka tërhequr vëmendje të madhe për shkak të polemikave rreth rishkrimeve dhe rixhirimeve, veçanërisht lidhur me akuzat ndaj Michael Jackson. Në rolin kryesor si Michael Jackson do të jete Jaafar Jackson, nipi i këngëtarit legjendë, ndërsa pjesë e kastit janë gjithashtu Miles Teller, Nia Long, dhe Kat Graham. Filmi pritet të dalë në 24 prill 2026.
